პორტალი მუშაობს სატესტო რეჟიმში

დღეს, თანამემამულეები სამშობლოში ინდოეთიდან დაბრუნდებიან


27.05.2020

საქართველოს მოქალაქეები, რომელთაც ინდოეთში სირთულეები შეექმნათ კორონავირუსის გავრცელების შედეგად და ვერ ახერხებდნენ სამშობლოში დაბრუნებას დაწესებული შეზღუდვების გამო, ინდოეთში საქართველოს საელჩოს დახმარებითა და ინდოეთის მთავრობის ორგანიზებით, “Vande Bharat Mission”-ის პროგრამის ფარგლებში, დღეს, 27 მაისს, სამშობლოში დაბრუნდებიან დელი-თბილისი-დელის ავიარეისით.

ინდოეთის რესპუბლიკის საგარეო საქმეთა სამინისტროსთან შეთანხმებით და კოორდინაციით, ავიაკომპანია Air India-ს რეისით სამშობლოს დაუბრუნდება 15 მოქალაქე. საქართველოს მოქალაქეებთან ერთად, საქართველოში გამოფრინდება ინდოეთში მყოფი აზერბაიჯანის რესპუბლიკის 18 მოქალაქეც.

ინდოეთის გოას, რაჯასტანისა და მაჰარაშტრას შტატებიდან საქართველოსა და აზერბაიჯანის მოქალაქეების ტრანსპორტირება ქ. დელიში განხორციელდა საელჩოს მიერ სპეციალურად დაქირავებული ავტობუსით.

აღსანიშნავია, რომ ინდოეთის რესპუბლიკაში საქართველოს საელჩო, საქართველოს საგარეო საქმეთა სამინისტროსთან კოორდინაციით, აქტიურად მუშაობდა COVID-19-ის პანდემიის გამო სახელმწიფო საზღვრების ჩაკეტვისა და ინდოეთში გამოცხადებული კარანტინის შედეგად, ინდოეთის სხვადასხვა შტატში ჩარჩენილი საქართველოს მოქალაქეებისათვის საჭირო დახმარების გაწევისა და მათი სამშობლოში დაბრუნების პროცესის ხელშეწყობის მიმართულებით.

მსოფლიოში კორონავირუსის გავრცელების გამო საქართველოსა და ინდოეთში საგანგებო მდგომარეობის გამოცხადების შემდეგ, საქართველოს საელჩოს ხელშეწყობით, დახმარება გაეწია ინდოეთის სხვადასხვა შტატში მყოფ საქართველოს 43 მოქალაქეს. ინდოეთის მხარესთან კოორდინაციით, ყველა მოქალაქეს საელჩომ ხელი შეუწყო სავიზო პროცედურების მოგვარების საკითხში. გოას შტატში მყოფი საქართველოს 5 მოქალაქე საელჩომ უზრუნველყო სასტუმროთი და საკვებით, 2 მოქალაქე საცხოვრებელი ბინით, ხოლო 17 მოქალაქეს კი ორჯერ გაეგზავნა ცხელი საკვები, საკვები პროდუქტებისა და პირველადი მოხმარების საგნების მარაგი.

ასევე, 2020 წლის მარტის თვეში, მსოფლიოში კორონავირუსის გავრცელების გამო საქართველოსა და ტაილანდის სამეფოში საგანგებო მდგომარეობის გამოცხადების შემდეგ, ინდოეთში საქართველოს საელჩოს (აკრედიტებულია ტაილანდის სამეფოში) ხელშეწყობით, დახმარება გაეწია ტაილანდში მყოფ საქართველოს 24 მოქალაქეს, ხოლო აპრილისა და მაისის თვეებში, საელჩოს ძალისხმევით და საქართველოსა და ტაილანდის საგარეო საქმეთა სამინისტროებთან, ნიდერლანდებსა და კატარში საქართველოს საელჩოებთან და ავიაკომპანია KLM-თან და Qatar Airways-თან კოორდინაციით, ტაილანდიდან გამომგზავრება შეძლო საქართველოს 17-მა მოქალაქემ. ამასთან, საელჩომ დახმარება გაუწია ტაილანდში მყოფ საქართველოს 23 მოქალაქეს ვიზის გახანგრძლივების პროცესში. აგრეთვე, 2 მაისს, საელჩომ უზრუნველყო ტაილანდის კუნძულ პხუკეტზე ჩარჩენილი საქართველოს 7 მოქალაქის ტრანსპორტირება ქ. ბანგკოკამდე, მათი საცხოვრებლითა და საკვებით უზრუნველყოფა 5 მაისს ტაილანდის დატოვებამდე.

 

https://mfa.gov.ge/News/27-maiss-saqartvelos-moqalaqeebi-samshobloshi-indo.aspx?CatID=5