1 თებერვლიდან დღემდე, მსოფლიოს სხვადასხვა ქვეყნიდან სახელმწიფოს დახმარებით, საქართველოში დაბრუნდა 9000-ზე მეტი მოქალაქე, ხოლო უცხოეთში საქართველოს დიპლომატიურმა მისიებმა ადგილზე დახმარება აღმოუჩინეს 18 000-ზე მეტ თანამემამულეს. საზღვარგარეთ მყოფი მოქალაქეების სამშობლოში ეტაპობრივად და ორგანიზებულად დაბრუნების პროცესი გრძელდება.
თანამემამულეების სამშობლოში ეტაპობრივი დაბრუნების ეფექტიანი ორგანიზებისა და მათი ადგილზე დახმარების მიზნით, მოქალაქემ უნდა შეავსოს, ელექტრონული ფორმით, სპეციალური განაცხადი, რომელიც გამოქვეყნებულია საგარეო საქმეთა სამინისტროს ვებ-გვერდსა და საქართველოს დიპლომატიური წარმომადგენლობების ვებ-გვერდებზე. აღნიშნულ განაცხადში მოცემული მონაცემების დამუშავების შემდგომ მიღებული იქნება შესაბამისი გადაწყვეტილება.
კორონავირუსთან დაკავშირებით პრემიერ-მინისტრის ხელმძღვანელობით მოქმედი საკოორდინაციო საბჭოს მიერ განსაზღვრული ავიარეისების ფარგლებში, ახლო მომავალში, დაგეგმილია შემდეგი ფრენების განხორციელება:
- 5 მაისი - ათენი-თბილისი;
- 6 მაისი - თბილისი-რიადი-ამანი-თბილისი;
- 7 მაისი - ამსტერდამი-თბილისი;
- 9 მაისი - ბერლინი-თბილისი;
- 15 მაისი - ამსტერდამი-თბილისი, რომელიც განკუთვნილია საქართველოს მხოლოდ იმ მოქალაქეებისთვის, რომლებიც იმყოფებიან ამერიკის კონტინენტზე და სურთ სამშობლოში დაბრუნება.
საკოორდინაციო საბჭოს დავალებით, ევროპიდან საქართველოს მიმართულებით რეისებს კომპანია „Georgian Airways“ ახორციელებს. საბჭოსვე მითითებით, ყველა ასეთ რეისზე ბილეთის ფასი შეადგენს 199 ევროს. აღნიშნული რეისები სრულდება ჯანდაცვის მსოფლიო ორგანიზაციის წესის სრული დაცვით და ყველა მგზავრი, რომელიც ჩამოდის საქართველოში, გადის 14-დღიან სავალდებულო კარანტინს.
[საქართველოს საგარეო საქმეთა სამინისტრო უცხოეთში მყოფი თანამემამულეებისადმი გაწეული დახმარებისა და მათი სამშობლოში დაბრუნების თაობაზე ყოველდღიურად განახლებად სტატისტიკურ ინფორმაციას საკუთარ ვებ-გვერდზე აქვეყნებს: http://gov.ge/s/adcb7]
