საქართველოსა და იაპონიას შორის დიპლომატიური ურთიერთობების დამყარების 30 წლის იუბილის აღნიშვნის ფარგლებში, საელჩოს ორგანიზებით, გაიმართა შეხვედრა იაპონიაში ქართული დიასპორის წარმომადგენლებთან.
მოწვეულ სტუმრებს საშუალება მიეცათ, ერთმანეთისთვის გაეზიარებინათ მოსაზრებები საქართველოს დამოუკიდებლობის ისტორიის, დღევანდელობისა და სამომავლო პერსპექტივების თაობაზე.
ღონისძიება ჩატარდა "DINNING·BOOKLOUNGE Creadisce"-ის სივრცეში, სადაც პარალელურად ქართული კულტურისა და ისტორიისადმი მიძღვნილი გამოფენა მიმდინარეობს.
გამოფენის სტუმრებს შესაძლებლობა აქვთ, გაეცნონ:
- იაპონურად ნათარგმნი ქართული ლიტერატურის ნიმუშებს;
- საქართველოს დამოუკიდებლობის გამოცხადების ისტორიას;
- ჩვენი ქვეყნის ეროვნული სამოსის კულტურას.
ამავე დროს, შესაძლებელია ქართული კერძებისა და ღვინის დაგემოვნება.
გამოფენა 25 მაისს გაიხსნა და 1 თვის განმავლობაში გაგრძელდება.