საქართველოს საელჩოს ინფორმაციით, ბულგარეთის რესპუბლიკის ჯანდაცვის მინისტრის 27 აგვისტოს ბრძანების თანახმად, ქვეყანაში საგანგებო ეპიდემიური მდგომარეობა გახანგრძლივდან 2021 წლის 30 ნოემბრამდე.
რადგან საქართველო იმყოფება ე.წ. “წითელ ზონაში”, ბულგარეთის რესპუბლიკაში საქართველოს მოქალაქეების შესვლა აკრძალულია, გარდა შემდეგი შემთხვევებისა:
- თუ საქართველოს მოქალაქეს აქვს ბულგარეთის რესპუბლიკაში ბინადრობის დროებითი, გრძელვადიანი ან მუდმივი უფლება; ან არის ბულგარეთის რესპუბლიკის მოქალაქის/ბინადრობის უფლების მქონე პირის ოჯახის წევრი;
- თუ საქართველოს მოქალაქეს გააჩნია ბულგარეთის რესპუბლიკის D კატეგორიის სასწავლო ვიზა და ირიცხება ბულგარეთის რომელიმე უმაღლეს სასწავლო დაწესებულებაში;
- თუ მოქალაქე არის სამედიცინო სფეროს წარმომადგენელი და ქვეყანაში ვიზიტი უკავშირდება მათი პროფესიული საქმიანობის წარმოებას;
- თუ მოქალაქე აწარმოებს საქმიანობას, რომელიც უკავშირება სამედიცინო საშუალებებისა და ტექნიკის გადაზიდვა-მიწოდებას;
- თუ მოქალაქე ქვეყანაში შემოდის სასოფლო-სამეურნეო და ტურიზმის სფეროში საქმიანობის გასაწევად (აღნიშნულის შესახებ შესაბამისი მოწვევისა და თანხმობის ქონის შემთხვევაში);
- თუ მოქალაქე ქვეყანაში შემოდის ბულგარეთის მოქალაქეობის მისაღებად, აღნიშნულის შესახებ ბულგარეთის რესპუბლიკის იუსტიციის მინისტრის შესაბამისი ბრძანების და წერილის არსებობის შემთხვევაში;
- თუ მოქალაქეს გააჩნია ბულგარეთის რესპუბლიკის ჯანდაცვის მინისტრის ან მოადგილეს ოფიციალური წერილობითი თანხმობა ქვეყანაში შემოსასვლელად.
პირებმა, რომლებსაც სურთ აღნიშნული გამონაკლისებით სარგებლობა, აუცილებლად უნდა წარადგინონ ვაქცინაციის სრული კურსის ჩატარების დამადასტურებელი სერტიფიკატი და PCR ტესტის უარყოფითი პასუხი, ან დოკუმენტი კოვიდის გადატანის შესახებ PCR ტესტის უარყოფით პასუხთან ერთად.
ხოლო პირები, რომლებიც ბულგარეთის რესპუბლიკაში შემოვლენ მხოლოდ PCR ტესტის უარყოფითი პასუხით, გაივლიან 10 დღიან თვითიზოლაციას.
საქართველოს მოქალაქეებისთვის ბულგარეთის რესპუბლიკის ტერიტორიის ტრანზიტულად გავლა დაშვებულია, თუ კი ისინი დაასაბუთებენ, რომ ქვეყანას დატოვებენ შესვლიდან მოკლე ვადაში. აღნიშნულ შემთხვევაში COVID-თან დაკავშირებული რაიმე საბუთის წარდგენა არ მოითხოვება.