საქართველომ ადამიანის უფლებათა ევროპულ სასამართლოში ისტორიული გამარჯვება მოიპოვა.
2021 წლის 21 იანვარს, 2008 წლის ომის საქმეზე სტრასბურგის სასამართლომ გადაწყვეტილება გამოაცხადა. ადამიანის უფლებათა ევროპული სასამართლო დაეთანხმა საქართველოს მოთხოვნას, რომ რუსეთმა 2008 წლის აგვისტოს ომის დროს ადამიანის უფლებათა ევროპული კონვენციის არაერთი მუხლი დაარღვია.
2008 წლის ომის საქმეზე სტრასბურგის სასამართლოს დიდი პალატის გადაწყვეტილებით დასტურდება, რომ:
- ცხინვალის რეგიონი და აფხაზეთი საქართველოს ტერიტორიის განუყოფელი ნაწილია და ოკუპირებულია რუსეთის მიერ;
- რუსეთმა განახორციელა ქართველების ეთნიკური წმენდა;
- რუსეთი პასუხისმგებელია ქართველი სამხედრო ტყვეებისა და სამოქალაქო პირების წამებისათვის;
- რუსეთი პასუხისმგებელია ქართველი სამოქალაქო პირების თავისუფლებისა და უსაფრთხოების უფლების დარღვევისათვის;
- რუსეთი პასუხისმგებელია საქართველოს მოქალაქეების მიმოსვლის თავისუფლების, პირადი და ოჯახური ცხოვრების დაცულობის უფლების და საკუთრების უფლების დარღვევისათვის;
- რუსეთი პასუხისმგებელია საქართველოს მოქალაქეების მკვლელობის გამოუძიებლობისათვის.
საქართველოს ვიცე-პრემიერის, საგარეო საქმეთა მინისტრის, დავით ზალკალიანის განცხადებით, ევროპის ადამიანის უფლებათა სასამართლოს გადაწყვეტილება 2008 წლის რუსეთ-საქართველოს ომის საქმეზე არის საქართველოს სახელმწიფოს უპრეცედენტო საერთაშორისო გამარჯვება, რომელმაც ცალსახად, სამართლებრივად დაამტკიცა რუსეთის ფედერაციის პასუხისმგებლობა 2008 წლის აგვისტოს რუსეთ-საქართველოს ომის დროსა და შემდგომ პერიოდში საერთაშორისო სამართლის ნორმებისა და ადამიანის ფუნდამენტური უფლებების დარღვევებში.
"სტრასბურგის სასამართლოს გადაწყვეტილება რუსეთის მიერ საქართველოს წინააღმდეგ განხორციელებული სამხედრო აგრესიის პირველი საერთაშორისო სამართლებრივი შეფასებაა, რომელმაც იურიდიულად დაადასტურა რუსეთის ბრალეულობა მის მიერ ჩადენილ დანაშაულებებზე. აღნიშნული გადაწყვეტილება არის ჩვენი ქვეყნის - სახელმწიფო ინსტიტუტებისა და სამოქალაქო საზოგადოების 12-წლიანი ძალისხმევის შედეგი და კიდევ უფრო მეტ სტიმულს გვაძლევს, რომ განვაგრძოთ აქტიური მუშაობა საერთაშორისო ასპარეზზე საქართველოს სუვერენიტეტისა და ტერიტორიული მთლიანობის განმტკიცების, საქართველოს განუყოფელი რეგიონების დეოკუპაციისა და ომით გაყოფილ საზოგადოებებს შორის შერიგებისა და ქვეყნის გამთლიანების მიმართულებით", - აღნიშნა დავით ზალკალიანმა.
