მსოფლიოში არსებული ახალი კორონავირუსის პანდემიის გამო, სამშობლოში დაბრუნების მსურველთა რაოდენობამ იკლო. აღნიშნულ ტენდენციაზე მიანიშნებს 12 მაისს განხორციელებული ლონდონი-თბილისის ავიარეისი, სადაც ბორტის სამგზავრო ადგილები არ იქნა სრულად ათვისებული. აღნიშნული რეისით სამშობლოში დაბრუნდა 120-მდე თანამემამულე, მათ შორის, სტუდენტები, ხანდაზმული პირები, განსაკუთრებული საჭიროებების მქონე მოქალაქეები და ტრანზიტული მგზავრები. საერთო ჯამში, დღეის მონაცემებით, მსოფლიოს სხვადასხვა ქვეყნიდან სამშობლოში - სახელმწიფოს ხელშეწყობით - ორგანიზებულად დაბრუნდა საქართველოს 10 780 მოქალაქე, ხოლო საქართველოს დიპლომატიური წარმომადგენლობების მიერ ადგილზე ქმედითი დახმარება გაეწია 20 218 მოქალაქეს.
მსოფლიოში ახალი კორონავირუსის გავრცელების ფონზე, საქართველოს სახელმწიფო განაგრძობს უცხოეთში მყოფი მოქალაქეების სამშობლოში ეტაპობრივი და ორგანიზებული დაბრუნების პროცესს. თანამემამულეების სამშობლოში ეტაპობრივი დაბრუნების ეფექტიანი ორგანიზებისა და მათი ადგილზე დახმარების მიზნით, მოქალაქემ უნდა შეავსოს, ელექტრონული ფორმით, სპეციალური განაცხადი, რომელიც გამოქვეყნებულია საგარეო საქმეთა სამინისტროს ვებ-გვერდსა და საქართველოს დიპლომატიური წარმომადგენლობების ვებ-გვერდებზე. აღნიშნულ განაცხადში მოცემული მონაცემების დამუშავების შემდგომ მიღებული იქნება შესაბამისი გადაწყვეტილება.
შეგახსენებთ, უცხოეთში მყოფი თანამემამულეების სამშობლოში დაბრუნების მიზნით, საქართველოს საკოორდინაციო საბჭოს მიერ განსაზღვრული ავიარეისების ფარგლებში, ახლო მომავალში, დაგეგმილია შემდეგი ფრენების განხორციელება:
- 15 მაისი - ამსტერდამი-თბილისი - აღნიშნული ავიარეისი განკუთვნილია მხოლოდ ტრანზიტული მგზავრებისათვის, კერძოდ, საქართველოს იმ მოქალაქეებისათვის, რომლებიც იმყოფებიან ამერიკის კონტინენტზე და სურთ სამშობლოში დაბრუნება;
- 17 მაისი - მინსკი-თბილისი - აღნიშნულ რეისს, საქართველოს მთავრობასთან შეთანხმებით, შეასრულებს ავიაკომპანია „ბელავია“;
- 18 მაისი - ლარნაკა-თბილისი;
- 20 მაისი - ათენი-თბილისი;
- 22 მაისი - რომი-თბილისი.
საკოორდინაციო საბჭოს დავალებით, ევროპიდან საქართველოს მიმართულებით ზემოჩამოთვლილ რეისებს (გარდა 17 მაისისა) კომპანია „Georgian Airways“ ახორციელებს. საბჭოსვე მითითებით, ყველა ასეთ რეისზე ბილეთის ფასი შეადგენს 199 ევროს. აღნიშნული რეისები სრულდება ჯანდაცვის მსოფლიო ორგანიზაციის წესის სრული დაცვით და ყველა მგზავრი, რომელიც ჩამოდის საქართველოში, გადის 14-დღიან სავალდებულო კარანტინს.
[საქართველოს საგარეო საქმეთა სამინისტრო უცხოეთში მყოფი თანამემამულეებისადმი გაწეული დახმარებისა და მათი სამშობლოში დაბრუნების თაობაზე ყოველდღიურად განახლებად სტატისტიკურ ინფორმაციას საკუთარ ვებ-გვერდზე აქვეყნებს: http://gov.ge/s/adcb7]
